АНГААХАЙ САМАР (PISTACHIOS)-ын тухай

Ангаахай (Pistachios) самар нь Төв Ази, Ойрхи Дорнодоос (Иран, Афганистан, Турк) гаралтай жижиг модонд ургадаг үр юм. Дэлхийн олон оронд (Австрали, АНУ, Мексик, Европ болон Азийн улс орнууд) энэхүү модыг нутагшуулан тариалдаг.

Мод нь 10 м хүртэл өндөр ургадаг. Үр жимс нь хатуу, цөцгийн өнгөтэй гаднах бүрхүүлтэй байдаг. Үр нь ягаан өнгийн арьс, цайвар ногоон махтай(чөмөгтэй), өвөрмөц амттай байдаг. Жимс боловсорч гүйцээд бүрхүүл нь ногооноос намрын шар улаандуу өнгөтэй болж өөрчлөгдөж, хэсэгчлэн задардаг ажээ.

Модыг тариснаас хойш 7-10 жилийн дараа үр жимсээ өгч эхэлдэг бөгөөд мод бүр хоёр жилд дунджаар 50 орчим кг (110 фунт) үрийг гаргадаг. Модыг тарьж ургуулах явцад их арчилгаа шаардагддаг, мөн супер ач тустай тул Ангаахай самар үнэтэй самрын тоонд ордог байна.

Ангаахай самар бол эрүүл өөх тос, эслэг, уураг, антиоксидант болон В6 витамин, тиамин зэрэг төрөл бүрийн шим тэжээлийн эх үүсвэр болдог. Тэд жин хасах, холестерин, цусан дахь сахарын хэмжээг бууруулах, ходоод гэдэс, нүд, судасны эрүүл мэндийг сайжруулах зэрэг маш их ач тустай юм.